Sinpraw Ginwang Ginjaw kata na hpaji jawng ni hpe bai hpaw sharin na matu hkyen shajin nga
Sinpraw Ginwang Ginjaw kata na hpaji jawng ni hpe COVID-19 ana zinli makawp ninghkap tara kata mai byin ai hte tara hpe hkan sa let jawng bai hpaw sharin sa wa na matu hkyen shajin nga sai lam, Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.
“COVID-19 ana zinli nhkoi shi ai raitim, jawng pat tawn ai shata (2) du sai, ana gaw galoi hkoi na re nchye ai, COVID-19 ana zinli gaw anhte hte galoi mung rau nga taw ai masa rai taw majaw, COVID-19 ana zinli kata kaw jawng bai hpaw sa wa na lam ni hte seng nna September shata praw 8, 9 ya shani tang madun bawngban hpawng galaw ai” nga nna Sinpraw Ginwang Ginjaw COVID-19 Ana Zinli Makawp Ninghkap Komiti Ningbaw, Du Kaba Maji Zau Ring tsun ai.
COVID-19 Ana Zinli Makawp Ninghkap tara hte maren jawng hpaw sharin lu na matu Ginjaw COVID-19 Ana Zinli Makawp Ninghkap Komiti hte Ginjaw Hpaji Dap de ahkaw ahkang tang hpyi na lam myit hkrum dawdan da ai rai nna, Ginjaw kawn matsun shana wa ai shaloi she jawng hpaw sa wa na re lam, Du Kaba matut tsun ai
Sinpraw Ginwang Ginjaw, Mai Ja Yang Muklum kata hta Mai Ja Yang College, Federal Law Acadamy, MIED, ILAS Jawng, Mungmyit Sinli lahta tsang jawng, Mai Ja Yang lahta tsang jawng, Htoi Gintawng Jawng, hte Boarder jawng ni (10) jan nga ai re lam matut chye lu ai.
