Sinpraw Ginwang Ginjaw, Mai Ja Yang Maukum kata na COVID-19 positive masha law malawng mai tsai sai
Sinpraw Ginwang Ginjaw, Mai Ja Yang Muklum kata na COVID-19 ana jep mu lu ai positive masha yawng marai 2153 kaw na marai 1994 gaw ana mai tsai sai majaw, tinang dum nta de wa shangun sai lam, Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.
Ya aten tsi tsi gawn lajang hkamla nga ai COVID-19 positive masha yawng marai 139 nga ai rai nna, negative rai sai marai 20 mung tsi tsi gawn lajang naw hkamla nga ai lam, ana jep chyoi ai lam hpe dingyang galaw nga ai raitim, ana bai jep mu ai lam nnga shi ai re hpe matut chye lu ai.
Ya aten Mai Ja Yang Muklum kata hta ana hkoi tsai wa sai masa re majaw, Muklum kata COVID-19 tara hte maren, pru hkawm sa ai lam hte gat seng ni hpe bai hpaw shangun ai lam galaw nga sai re hpe chye lu ai.
Sinpraw Ginwang Ginjaw kata masha pru shang ai lam hpe dingyang naw pat hkum tawn ai raitim, ana hkoi tsai wa ai masa hta hkan nna COVID-19 ana makawp maga tara hte maren atsawm jen jep nna hkap la jashawn sa wa na re lam chye lu ai.
