Sinpraw Majoi Gawknu hta mungshawa zuphpawng galaw
Wunpawng Mungdan Shanglawt Hpung, Ginjaw Komiti kaw nna lam masan ai hte maren, Laiza Muklum Sinpraw Majoi Gawknu hta August shata praw 3 ya jahpawt hkying 10:00am aten hta mungshawa zuphpawng galaw ai lam chye lu ai.
Zuphpawng hpe Mungchying Uphkang Dap, Ginjaw Uphkang Rung, Muklum Uphkang Rung, Hkairem Magam Dap hte seng ang ai magam dap ni lawm nhtawm galaw ai lam re.
Salang Kaba Labya Tang Gun (Mungchying Uphkang Dap Lithkam) kaw nna, magup sumhpa hte ra mara lam ni hpe tsun sanglang dan ai. Dai hpang Du Up Jum Anai Zau Hkawng (DLR- Jau, Q-1) kaw nna, n-gu malu masha htuk jaw ya ai lam hte seng nna tsun sanglang dan ai lam galaw ai.
Matut nna, Sara Kaba Kareng Brang Seng (Hkairem Magam Dap Lithkam) kaw nna mung, mungshawa hkai lu/sha lam hte seng nna sanglang hpaji jaw ai lam galaw ai re.
Mungshawa zuphpawng a yaw shada lam hpe hpawng hpu-awn Salang Kaba Wa La Gum Ja Du (Laiza Muklum Uphkang Du) kaw nna ndai zawn tsun ai.
“Anhte a makau hta byin hkrum nga ai, hpyenmasa mungmasa mayak manghkang ni a majaw anhte hta lusha shimlum lam hte seng ai, kaga lam ni hte seng ai, yak hkak dut dang wa ai lam law law nga ai ndai hpe anhte tinang lagaw tinang tsap nna shakut ra ai, hparan ra ai ngu ai de, mungshawa hpe ningmu jahpaw ai lam re”
Lai wa sai 2021 ning, COVID-19 lockdown garai nsawng ai aten hta anhte a masa lam ni hpe Muklum Uphkang Rung ni kaw nna mungshawa ni hpe sanglang ai lam galaw sai, dai ning gaw shawng ningnan lang galaw ai lam re. Anhte ra wa ai hta hkan nna, ntsa tsang a jasat ai policy ni hta hkan nna mung, ra jang ra ai hku mungshawa hpe ningmu jahpaw ai lam, bawngban woi ai lam, sanglang ai lam ni hpe ding yang galaw sa wa na re lam, Salang Kaba matut tsun ai.
Mungshawa zuphpawng hta Laiza Muklum na mungshawa ni, Laiza Muklum kata kaw nga ai hpyen yen kanu kawa ni hte Mung Seng Yang na kanu kawa ni yawng marai 700 jan sa du shang lawm ai lam chye lu ai.
