Sinpraw Majoi Htunghking shingni jawng yu hpawng galaw
Wunpawng Mungdan Shanglawt Asuya, Htunghking hte Laili Laika Magam Dap kaw nna hpaw sharin nga ai, masat yan (6) sinpraw majoi htunghking shingni jawng yu hpawng hpe November shata 22 ya jahpawt hkying 9:00am aten, Htunghking hte Laili Laika Magap Dap wang kaw galaw la lu sai lam chye lu ai.
Jawng yu hpawng hta Htunghking hte Laili Laika Magap Dap Lithkam Salang. Chyana Zau Awn kaw nna, shatsam mungga tsun ai hta
“Dai ni na anhte kaw sharin ai lam gaw, ningpawt ninghpang ningmu jahpaw ai lam sha re, mare buga kaw du wa ai shaloi chyoi chye ai mung man salang ni, kanu kawa ni hpe san laman ai lam, laili laika kaw sawk hkrawk hti shachyaw la ai lam, mung man salang ni hte hkri dun nna magam bungli de hpadi hpadaw re ai lam ni hpe galaw sa wa mu, shaloi anhte a mahkrum madup lam ni hte hti hkrawk hka ja, mu la na la ai ni hte hpung jat nna, Wunpawng sha ni a htunghking hpe ginlen ya lu ai, kasi madun lu ai, sharin achyin ya lu ai, hkrang shapraw ya lu ai, htunghking hta woi awn lu ai, ningbaw ningla ni lahpa galai na kashu kasha ni tai wa na re ai” nga nna tsun ai.
Sinpraw Majoi Htunghking shingni jawng hta ningpawt ninghpang ka manawt hkrang, htunghking mahkawn ka manawt hkrang, nau shawng maka, kabung htawngka, jinghpaw laika ka htung ka lai, ninggawn mung masa, nsi not hte choir, miwa ga laika, Wunpawng gumrawng gumtsa, num wawn numla majun, rep chywi hpaji ni hpe sharin ya ai re lam chye lu ai.
Htunghking hte Laili Laika Magam Dap hpe laiwa sai 2007 ning kaw nna hpaw hpang wa ai rai nna, masat yan (6) jawng lung ladaw hpe (2) ning masat let hpaw sharin wa ai hta jawngma yawng marai (18) jawng yu la lu sai lam chye lu ai.
Hpawng lamang hta saw saga da ai hpung woi sara ni, Magap Dap, Makan Dap hkan na magam gun ni hte mungshawa ni sa du shanglawm ai hte galaw la lu sai lam chye lu ai.
