SNA ni mungshawa arung arai hpe mya lu mya la nga
SNA hpyen hpung ni mungshawa arung arai hpe mya lu mya la nga ai lam chye lu ai.
Gasat gala majan a majaw hpyen hprawng koi yen nga ai, Indawgyi ginra Hepa mare na mungshawa ni a manu dan ai arung arai hpe Sam hkyen P.T.Ts (SNA) hpyen hpung ni mya lu mya la nga ai lam, ginra mungshawa ni kaw na chye lu ai.
Dai ginra na mungshawa ni gaw gasat gala majan a majaw, hpyen hprawng koi yen nga ai aten, SNA hpyen hpung ni mungshawa a arung arai hpe shanhte ra ai hku htaw la, mya lu mya sha nga ai re lam chye la ai.
Hugawng ginra kata rai nga ai Oi Law, Lapu Hka hte Pya Soi ginra ni hta mung, Sam hkyen P.T.Ts (SNA) hte Min Zay Thant P.T.Ts pawng hpawm hpyen hpung ni mungshawa arung arai ni hpe mya lu mya sha ai lam galaw nga ai hpe chye lu ai.
Sam hkyen P.T.Ts (SNA) hte Min Zay Thant P.T.Ts pawng hpawm hpyen hpung ni gaw, shanhte hpyen shamu shamawt nna du nga ai mare kahtawng shara hkan, mungshawa a arung arai ni hpe ra ai hku mya lu mya sha ai lam galaw nga ai sha n-ga, mungshawa dum nta ni hpe mung wan nat jahten kau ya ai lam ni galaw nga ai hpe chye lu ai.
