Street Performance lamang hpe woi awn ai ramma marai 2 hta na Shadang Pawlu hpe tara rung kaw san jep ai lam galaw
Lam ntsa shingni hpaji hkrang shala Street performance lamang hpe woi awn ai majaw nyein suzi pukma 19 hte tara jawat hkrum ai ramma marai 2 hta na Shadang Pawlu hpe Myitkyina tara rung kaw July shata 18 ya shani hta san jep ai lam galaw ai hpe na chye lu ai.
Tara rung kaw san jep ai hte seng nna Shadang Pawlu ya na zawn tsun ai. Tara kasa wa gaw anhte galaw ai mabyin masa hte seng nna galoi ten kadai hte sa hkrum ai, gara masa lam hku galaw da ai lamang galaw nga ai aten hta Pyada ni gara hku sa pat hkum ai lam ni hpe san jep ai. Tara jawat ai maga na ni gaw nyein suzi kaw nshang yang shang hkra jep san ai lam galaw ma ai. Anhte mung upadi lam hku nna galaw ging ai hpe atsawm sha galaw ai re majaw mai byin ai daram ninghkap mat na, dang na ndang na ngu gaw madung nre. Myen Mungdan gaw Democracy de sa wa ai shaloi mungchying sha ni a lu ging lu ang ai ahkaw ahkang mat taw nga ai, ndai zawn re hpe grau nna htawng madun lu na matu dai maga de ja ja tsap ai.
Anhte galaw ai lam gaw Mungdan hpe gasu kabrawng byin hkra, Asuya ni hpe jahpyak ai lam, lit nga ai ni hpe jahprak ai lam bai nna shawa dawtsa hte seng ai kaw dingbai dingna byin shangun ai lam langai ma nlawm ai, anhte galaw ai magam bungli gaw simsa lam hpe grau nna madi shadaw ai magam bungli galaw ai kaw maga mi hku nna lit nga ai ni anhte hpe nyein suzi hte tara jawat ai ngu gaw simsa lam hpe shanhte gara hku mu mada ai kun simsa lam hpe gara hku ra sharawng ai i? nga nna Shadang Pawlu matut tsun ai.
Shayi Seng Nu Pan kaw nna mung ya na zawn tsun ai hta ndai gaw tara jawat ai baw mung nre tara jawat ai Pyada Du hte mung jahta ngut sai shi nan mung nyein suzi nmara ra ai nga tsun wa ai raitim mung ya gaw anhte hpe nyein suzi hte tara jawat ai hpe mu mada ai, ndai gaw Pyada dap ni hku nna shanhte kam ai shaloi upadi hpe jai lang ai grau nna gaw simsa lam hte seng nna shamu shamawt ai ni hpe masing nga nga hte dasang galaw ai ngu nna sha mu mada ai, dai majaw ndai hte seng nna anhte gaw mara tsep kawp nnga ai matut nna ninghkap sa wa na, nga nna tsun ai.
Lai wa sai June shata 9 ya shani hta Shadang Pawlu hte Shayi Seng Nu Pan yan woi awn let hpyen yen mungshawa ni hkam sha ai hpe lam ntsa shingni hpaji hkrang shala Street performance lamang hpe woi galaw ai majaw, Myen Balik Du Min Thant Zaw kaw nna nyein suzi pukma 19 hte tara jawat da ai re. Du wa na July 25 ya shani hta gaw Shayi Seng Nu Pan hpe bai san jep na re lam chye lu ai.
Photo: Kachin Youth Movement
