Sumpra Bum mare kata hta COVID-19 ana makawp maga bungli hpe aten masat nna galaw
Sumpra Bum Hkamja Dap ni hte Ginra Asuya COVID-19 Komiti ni pawng hpawm nna, Sumpra Bum mare nnan shang wa ai shara kaw jahpawt hkying 7:00am aten kaw nna shana hkying 7:00pm aten lapran hta laiwa laisa masha ni hpe jep chyoi ai lam galaw nga ai rai nna, ngam ai aten ni hta hkawm sa hkawm wa lam pat da ai re hpe na chye lu ai.
Sumpra Bum ginra hta COVID-19 ana zinli makawp maga lam hte seng nna lai wa lai sa masha ni hpe jep sagawn ai lam galaw ai sha n-ga, mare kata COVID-19 ana zinli hte seng nna hpaji jaw tsun ndau ai lam ni galaw nga ai re lam, Sumpra Bum Hkamja Du Lithkam, Sarnum Kaba Jinghkang Lu Ja tsun ai.
“Ya anhte kaw gaw COVID-19 ana zinli positive byin ai kaga shara kaw na wa ai masha ni hpe nhtoi 21 ya Facility Qurantine tawn da ai, 21 ya ndu shi yang shanhte a ana jep kumla hpe la nna, Myitkyina Hkamja Dap kaba de sa sa ai, shanhte litla ya nna Myen Mung kaw na ana jep chyoi shara de bai sa ya ai lam galaw ai, ya anhte marai 4 hpe jep tawn da ai lam ni nga ai” nga nna tsun ai.
La Yang Zup makau kaw na nlung dup ai bungli galaw masha langai gaw Sam Mung, Si Sai kaw Quarantine hkam la ai aten hta positive byin ai majaw, dai shara kaw ngam nga ai bungli galaw masha ni hpe mung ana jep chyoi ya na masing nga ai rai nna, hkawm sa hkawm wa masha masha ni yawng Mask shakap ra na lam, n shakap ai ni hpe sadi jaw dam gayat na lam, manam jarawp ni hpe pat tawn da na lam, seng ndung sha lu na lam ni hpe hkamja dap hte Ginra Asuya COVID-19 Komiti ni masat da ai lam hte maren, atsawm jep sagawn nna hkrak tup galaw sa wa na masing nga ai re lam, Sarnum Kaba Jinghkang Lu Ja matut tsun ai kaw na chye lu ai.
Sumpra Bum mare hta matut mahkai mung yak ai, hkawmsa hkawm wa hkrun lam mung yak hkak ai re majaw, ginra masha ni hta ana zinli byin nna Qurantine shang ra ai rai yang, malu masha kawn hkawt yak hkak hkrum na hpe myit tsang nga ai lam, Sumpra Bum mare na Rev. Zau Awng tsun ai.
“Ana makawp maga ai lam hpe mi na hta grau nna galaw ra ai raitim, yak hkak ai re majaw, Mask ni lata kashin sapbya ni mung nlu mat ai re majaw grau myit tsang ai, hkamja lam jep chyoi ai shara mung pat da ai lam nga ai raitim, shana yup tung hkan Modo, Cycle lagu shang ai lam ni mung nga ai re majaw grau hkrit tsang nga ai re” nga nna tsun ai.
Myitkyina hte Sumpra Bum lapran hta lam galaw nga ai bungli galaw masha ni hpe mung mare kahtawng hkamja dap kaw na tsi magam gun sara/num ni kawn hkamja lam jep chyoi ya nga ai re hte Sumpra Bum mare kaw Quarantine hkam la nga ai masha marai 4 nga sai rai nna, dai masha marai 4 a ana kumla hpe Myen Mung ana jep chyoi shara kaw sa da ai re lam chye lu ai.
Laiwa laisa masha ni hpe jep sagawn ai lam galaw ai hta shanhte a hkringdat hpe atsawm ntsun dan ai majaw, mayak mahkak lam ni byin ai sha n-ga, Facility Qurantine masha ni a ana jep kumla hpe Myitkyina Hkamja Dap kaba de sa sa na matu hkrun lam yak hkak nga ai re hpe mung matut chye lu ai.
