Sumpra Bum mare kaw Putao Ginwang kata na Myen hpyen hpung hpyen n-gun 400 jan wa shanu nga
2020 ning ra lata poi awngdang lu hkra Me shanglawm bang na matu, Puato Ginwang kata na pawnghpawm Myen hpyen hpung, hpyen n-gun 400 jan gaw Sumpra Bum mare kata na mare kahtawng nkau ni hta, mungshawa hkring bu hpun sumraw nna laiwa sai August shata kaw nna wa shanu shingbyi nga ai lam na chye lu ai.
Ndai zawn Myen hpyen hpung ni kaw nna Sumpra Bum mare kata kaw hpyen n-gun law law hte wa shanu nga ai a ntsa, ginra masha ni a ningmu hpe matut mahkai san yu ai hta,
“N-gun ndai daram bang da ai nga jang maga mi de shanhte na ra lata poi ngut ai hpang, lama ma galaw wa na masa nga na kun ngu ntsa lam mu mada ai, ya gaw shanhte Me bang ai ga baw hte lung wa ai gaw rai nga, raitim dai ngut ai hpang shanhte hpyen masa lam ni shamu shamawt wa na masa ni pru wa na kun ngu mu mada ai” nga nna Sumpra Bum ginra masha langai tsun dan ai.
“Shanhte gaw ya na ra lata poi hta Me shadang la hkra ngu ai yaw shada lam nga ai ngu maram lu ai, bu htawt bungli galaw masha ni mung nga ai re majaw, shanhte party kaba lahkawng gaw dang lu hkra ngu shingjawng taw ai re ngu mu mada ai” nga nna Sumpra Bum mare lawk salang langai tsun dan ai.
Myen hpyen la ni gaw shinggan bu hpun palawng bu hpun nna mare kata si maw si mai mari hkawm ai lam, mare kata pru pru shang shang galaw ai lam nga ai raitim, ya aten du hkra mungmare masha ni hpe jahkrit shama ai lam nnga ai re hpe buga masha ni tsun dan ai kaw na chye lu ai.
Sumpra Bum ginra kata 2020 ning ra lata poi hta shingjawng lawm na party ni gaw, ျပည္ခိုင္ျဖိဳး, NLD, KSPP, KNC, UDP, kaga party hte rai yang, yawng party 7 nga ai lam na chye lu ai.
Photo Credit; Sumpra Bum
