Sumpra Bum Muklum kata KIO Asuya jawng hpaw sharin nga
Dindung Ginwang Ginjaw, Sumpra Bum Muklum kata, KIO Asuya kaw nna, hpaji jawng hpaw sharin ya nga sai lam chye lu ai.
June shata kaw nna, Sumpra Bum Muklum hte makau grupyin kahtawng hkan na jawng ni hta lahta tsang, lapran tsang, lawu tsang jawng 8 hpaw sharin ya nga sai lam, Sumpra Bum Ginwang Ningtau Hpaji Du, Sara Kaba Naiding Zau Naw tsun ai.
“Laika ni hpe sharin sa wa ai lam hta yak dik gaw hti laika buk hte ma ni ka na laika buk ni re. lawu tsang daw ma ni a laika buk ni hpe grai nlu la shi ai. lam ni hten ai, mahkrun masa shingra hpyen ni hkrum ai, jawng hpaw da sai re majaw, ma ni hpe aten dep hti laika, ka laika buk ni lu wa na matu ladat shaw nga ding yang re” nga nna Sara Kaba matut tsun ai.
Laiwa sai ten gumshem Myen hpyen dap ni uphkang nga ai jawng ni hpe ya aten KIO asuya kawn, Sumpra Bum jawng hpe lahta tsang jawng langai hku hpaw sharin sa wa ai hta tsang (11, 12) sharin na jawng sara/num nlu ai majaw, tsang (11, 12) hpe greng grak rai nlu sharin shi ai lam chye lu ai.
