Tamahkan kaw nbungli hte wa gap gasat ai majaw, mungshawa si hkala hkrum
Hpakant ginra, Tamahkan kaw gumshem Myen hpyen dap ni nbungli hte wa gap gasat ai majaw, mungshawa si hkala hkrum ai lam chye lu ai.
March shata praw 7 ya shani hkying 1:00pm aten daram hta Hpakant, Tamahkan mare na, Salang Kyaw Naing na lung seng maw bungli galaw shara kaw, gumshem Myen hpyen dap ni nbungli hte wa gap gasat ai majaw, mungshawa marai (1) asak si sum mat nna, marai (1) hkala hkrum ai lam, ginra masha ni kaw na chye lu ai.
Si hkala hkrum ai yan gaw, lung seng maw bungli galaw shara kaw nga ai hkan nu rai nna, kanu asak si sum mat nhtawm, kasha (3) ning daram re ma hkala hkrum ai hte dum nta ni mung hten za hkrum mat ai lam chye lu ai.
Nbungli hte wa gap gasat ai shara gaw, gasat gala majan byin ai lam nnga ai shara rai nna, gumshem Myen hpyen dap ni mungshawa ni hkrai nga ai kaw wa gap gasat ai re lam chye lu ai.
Hpakant Mashi Kahtawng akyu hpyi bum grup yin kaw mung, March shata praw 3 ya shani kaw nna KIA pawng hpawm hpyen hpung ni hte gumshem Myen hpyen dap ni gasat gala majan byin nga ai hta ya aten du hkra, lahkawng maga hpyen masa shaja hkat nga ding yang re ai lam chye lu ai.
