Tang Hpre ginra Myen hpyen dap ni hpyen shamu shamawt n-gun htu shadut nga

Myitkyina Tang Hpre ginra hta gumshem Myen hpyen dap ni hpyen shamu shamawt n-gun htu shadut nga ding yang re ai lam chye lu ai.

Gumshem Myen hpyen dap ni gaw ndai laman shani shagu ngu na, Tang Hpre ginra de hpyen shamu shamawt n-gun htu shadut nga ding yang rai nna, Tang Hpre KBC hte RC nawku jawng ni hta dap jung shara la nga ai lam, ginra masha ni tsun ai.

Ndai zawn gumshem Myen hpyen dap ni hpyen shamu shamawt n-gun htu shadut nga ai hta dai ginra na mungshawa ni gasat gala majan byin wa na tsang ai majaw, hpyen koi yen nga ai lam chye lu ai.

Matut nna Manmaw ginra hta mung, KIA pawng hpawm hpyen hpung ni hte gumshem Myen hpyen dap ni gasat gala majan laja lana matut manoi byin nga ai hta gumshem Myen hpyen dap gaw nbungli, drone ni hte laja lana ninghkam gap gasat nga ding yang re ai hpe chye lu ai.