Tara kasa marai 2 hte Danai hpyen yen mungshawa ni bawngban hpawng galaw
KIA Dap Ba ( 2 ) ginra, Hugawng Ginwang, Danai Muklum Kinsa Lawk Manau wang kaw tara kasa salang Maran Lum Jat hte tara kasa salang Nwawt Naw Awng yan hte Danai kaw nga ai hpyen yen mungshawa ni gaw, September 18-19 lahkawng ya tup bawngban zuphpawng galaw ai lam, zuphpawng hta sa lawm ai salang langai shana wa ai.
Zuphpawng hta tara kasa yan hte hpyen yen kanu kawa ni bawngban ai hta, majan a majaw gan yen tawn ai mare kahtawng ni hkan Ja htu company ni shang wa na re. Dai hpe kara hku ninghkap na hte tinang a lamu ga hpe gara hku makawp maga na ngu ai lam ni, hpyen yen mungshawa ni hku nna gaw, tinang a mare kahtawng de bai nhtang wa nga yang shimlam hpe tsang nga ai lam, tsun bawngban hkat ai hpe salang wa tsun ai.
KIA Dap Ba ( 2 ) ginra de, lai wa sai shata man 6 hta Myen hpyen dap kawn hpyen n-gun law law hte KIA hpyen dap hpe laja lana htim gasat lung wa ai majaw, mare kahtawng law law hkan na mungshawa ni Danai Muklum de hpyen koi yen nga ra mat ai re.
Ya aten hta Danai Muklum kaw hpyen koi yen nga ai mungshawa ni yawng gaw marai hkying mi jan nga ai rai nna, Myen hpyen dap ni kawn malu masha hte arung arai ni htaw shalai lung wa ai hpe pat shingdang ai lam nga lai wa ai majaw, hpyen yen mungshawa ni hta malu masha naw yak hkak nga ai re lam chye lu ai.
