Tara masa ( ဥပေဒ ) hte seng nna ningmu jahpaw sharin hpawng galaw ngut
Namti Lambraw Yang hka lup hpung nawku jawng wang, gawknu hta Auguts 30 ya shani kaw na 31 lahkawng ya tup, masha marai 150 jan shanglawm ai hte tara masa ( ဥပေဒ ) hte seng nna ningmu jahpaw sharin hpawng hpe galaw ngut sai lam chye lu ai.
Sharin hpawng a yaw shada lam gaw, Manghkang ginra kaw nga taw ai anhte Wunpawng myu sha ni hkrit ai lam grai nga ai, ladu shalai hkrit ai mung nga taw ai re majaw, ndai ladu lai hkrit ai gaw, tara masa ( ဥပေဒ ) mahkrun nchye na re hpe mu jep shapraw lu ai masa nga ai majaw ningmu jahpaw ai lam re, tara masa mahkrun hpe chye na hkawn hkrang wa jang gaw, tengman ai lam hta tsap nna pawng galaw ra ai magam bungli ni hta nhkrit ntsang lu galaw wa na matu re, nga nna hpawng a lit hkam sara Nwaw Zau Jat tsun ai.
Sharin hpawng hta Namti, Kanla, Lambraw Yang, Kasung mare kahtawng mali na hpung hte seng ai salang ni hte pat jasan ni, karum kahtau wuhpung ni shanglawm ai, sharin sara gaw tara kasa sara Lahpai Zau Sam hte saranum Lum Naw yan sa sharin ya ai re lam chye lu ai.
