Tara masa hte seng ai New Star Law-Firm rung lakung hpaw lamang galaw
Mungmyit Sinli, Kuthkai mare kaw Tara masa hte seng ai New Star Law- Firm rung lakung hpaw lamang hpe June shata praw 3 ya jahpawt hkying 10:00am aten hta galaw ai lam na chye lu ai.
New Star Law-Firm Rung hpe 2019 ning May shata hta Lashu lawk 1 kaw rung daju hku nna hpaw hpang ai hta, daining 2020 ning hta gaw laning mi hpring sai re majaw, Kuthkai kaw rung nnan bai hpaw jat ai re.
“Kuthkai ginra hta tara masa lam yan hpe myit lawm ai ni pawng nna rau lata gindun bungli galaw sa wa lu na matu, Wunpawng amyu sha ni nga ai shara hta tara masa lam hpe myit lawm ai ramma ni, tara kasa ni pru wa lu na matu hte tara masa lam yan hta ra ai lam ni hpe garum pawn ba sa wa lu na matu yaw shada ai re” nga nna Tara Kasa Dabang Pawlu tsun ai.
Tara masa lam (Law) hpe sharin hkaja nga ai Wunpawng ramma ni hpe lam hpaw ya ai lam re sha n ga, amu bungli sharin ya nna magam bungli hpe rau jawm galaw sa wa ai masa re lam, Tara Kasa Dabang Pawlu matut tsun ai kaw na chye lu ai.
Hpaw hpawng lamang hta seng ang ai Htunghking kaw na ningbaw ningla ni, amyu shayi ni, ramma ni, NeT Organization wuhpung wuhpawng ni, nawku hpung up Sara hte mare uphkang Salang ni sa du shang lawm ai lam chye lu ai.
