Tara upadi hte seng nna TOT wunkat jaw
Htoi Gender And Development Foundation kaw nna nta kata num/la roi rip zingri ai lam hte seng nna, upadi madi shadaw ningmu jahpaw (အိမ္တြင္းအႀကမ္းဖက္မွႈဆိုင္ရာ ဥပေဒအေထာက္အကူျပဳအျမင္ဖြင့္) Sara tai (TOT) wunkat hpe Myitkyina, Njang Kawng, Ti Ta nawku jawng wang kaw June shata 24 ya shani kaw nna 28 ya shani du hkra aten masat wunkat jaw ai lam chye lu ai.
Wunkat jaw ai yaw shada lam hte seng nna Htoi Gender And Development Foundation kaw na Sara Maran Sut Htoi Seng Awng tsun ai.
“Anhte Jinghpaw Mungdaw sha nrai, Myen Mung ting hta COVID-19 ana zinli a majaw, magam bungli ni gan jahkring da ra ai, stay home aten laman hta, num/la garan ginghka ai mabyin manghkang ni hpe mu lu ai re majaw, anhte mungdan kaw num/la garan ginghka ai lam a majaw byin pru wa ai roi rip zingri ai lam hpe nbyin wa hkra shamyit kau lu na matu, shada roi rip zingri ai lam byin wa ai ten hta tara rap ra ai lam hpe lu la na matu yaw shada ai let ndai upadi madi shadaw ai wunkat galaw ai re” nga nna tsun ai.
Wunkat hta Yangon kaw na Sara/num lahkawng hpe saw shaga let, ganing re mabyin ni gaw num/la garan ginghka roi rip zingri ai lam hpe byin shangun ai lam, roi rip zingri ai lam byin wa ai ten hta tara rap ra lam lu la hkra gara hku galaw ra ai lam, upadi lam hte seng nna gara de sa du shawk shawn ra ai ngu ai upadi lam yan ni hpe madung sharin achyin ya ai re hpe chye lu ai.
Wunkat hta la marai 4, num marai 16 sa du sharin hkam la nga ai rai nna, n-gup magap Mask shakap ai lam hpe jahpawt hkying 9:00am kaw nna hkying 12:00pm aten hta kalang, shana maga hkying 1:00pm kaw nna hkying 4:00pm aten hta kalang, lani mi hta lahkawng lang galai shangun ai lam, wunkat gawk shang wa ai hte lata kashin shangun ai lam ni galaw ai sha n-ga, marai langai hte langai pe 6 gang hkat nna sharin achyin ai lam galaw nga ai re hpe mung chye lu ai.
Wunkat lung la ngut sai Sara/num ni gaw tinang hte seng ang ai buga ginra ni hta sharin la lu sai num/la hte seng ai upadi lam yan ni hpe ningmu jahpaw hkaw tsun dan ai lam, wunkat jaw ai lam ni galaw sa wa na masing nga ai re lam, Sara Maran Sut Htoi Seng Awng matut tsun ai kaw na chye lu ai.
