Tarung Hka mahkrai kaw Myen Hpyen Dap ni mung shawa ni hpe aten masat nna hkawm sa ahkang pat

Danai Shingbwi Yang, Tarung hka mahkrai kaw Myen Hpyen Dap Hk.L.Y (260) ni kaw nna, lai wa lai sa mung shawa ni hpe gumhpraw dingyang hta sha nga ai sha n-ga, shana de hkying 6:00pm aten kaw nna mahkrai lam chyinghka pat kau ya ai majaw, mung shawa ni hkawm sa hkawm wa grai yak hkak nga ai lam na chye lu ai.

Shana de wa hpang hkrat ai kadai raitim mung, tinang Modo, Cycle hte tinang htaw wa ai arung arai ni hpe mahkrai shinggan kaw tawn da nna, masha hkum gaman sha shang wa ahkang jaw ai majaw, mung shawa ni jam jau nga ai lam, dai ginra na salang langai tsun ai.

“Lai wa lai sa anhte mung shawa ni hpe gumhpraw shagyeng hpyi sha nna shana hkying 6:00pm aten du jang zaw la kau ai rai nna, anhte mare masha ni hpe jam jau jaw nga ai. Modo, Cycle hte yi sa hkau na sa ai ni mung, mare shinggan kaw Modo, Cycle tawn kau da ra ai mayak manghkang ni byin hkrum nga ga ai” nga nna tsun dan ai.

Dai ginra na mung shawa ni law malawng gaw yi galaw sha ai masha ni law ai rai nna, shana bungli jin, jan du yang she wa ai ni re majaw, ndai Myen Hpyen Dap ni wa du ai kaw nna, mare masha ni jam jau nga ai lam na chye lu ai.

Shana hkying 6:00pm a hpang mahkrai chyinghka pat nna hkawm sa hkawm wa ahkang njaw ai raitim, hpun htaw Modo ni hpe gaw shalai nna gumhpraw hta sha nga dingyang re lam, ginra masha ni shiga shana wa ai kaw na chye lu ai.

Photo Credit;