TNLA hpyen hpung hte Myen hpyen Dapnu ( 88 ), Hk.M.Y ( 505 ) ni shara 4 kaw gap hkat
Mungmyit Sinli Ga ( Kachin Sub-State ) KIA Dap Ba ( 4 ), Dap Dung ( 34 ) ginra, Mandung ginwang hte Mungmyit ginwang shara ni hta TNLA hpyen hpung hte Dapnu ( 88 ),
Hk.M.Y ( 505 ) dap na hpyen hpung ni shara 4 kaw gasat majan matut byin ai lam na chye lu ai.
Mandung ginwang Hkumung mare makau kaw TNLA Dap Dung ( 595 ) hpyen hpung hte Myen hpyen Dapnu ( 88 ) hpyen hpung ni, May 10 ya jahpawt hkying 3:10am aten kawn hkying 11:30am aten du hkra, gap hkat ai, shani hkying 1:15pm kawn hkying 3:10pm aten hta Na Aw mare makau kaw TNLA Dap Dung ( 577 ) hte Dapnu ( 88 ) na hpyen hpung ni bai gap hkat ai lam chye lu ai.
Shani hkying 1:00pm aten kawn hkying 3:30pm aten hta mung, TNLA Dap Dung ( 765 ) hpyen hpung hte Myen hpyen Dapnu ( 88 ) hpyen hpung ni, Loi Hkun mare makau kaw bai gap hkat ai, dai hpang Mungmyit ginwang Tung Gyi mare makau kaw TNLA Dap Dung ( 773 ) na hpyen hpung hte Hk.M.Y ( 505 ) dap na hpyen hpung ni, hkying 2:40pm aten kawn hkying 3:50pm aten du hkra,yawng shara 4 kaw laja lana gasat majan byin ai lam, TNLA shiga lawk kawn chye lu ai.
TNLA ginra de Myen hpyen dap ni hpyen n-gun hte htim gasat sa wa ai majaw, May shata laman gasat majan byin ai 21 lang rai nna, nbungli hte 4 lang wa gap gasat laiwa sai re lam mung na chye lu ai.
