TNLA hte Myen hpyen dap Dapnu ( 88 ) ni laja lana gasat majan matut byin
Mungmyit Sinli Ga ( Kachin Sub-State ) KIA Dap Ba ( 4 ), Dap Dung ( 8 ) ginra, Kawng Hke mare hte Pan Tsan mare lapran e, May praw 2 ya shani hkying 10:18am aten kaw na
hkying 1:30pm aten du hkra, TNLA Dap Dung ( 571 ) na hpyen hpung hte Myen hpyen dap Dapnu ( 88 ) na hpyen hpung ni, laja lana gasat majan byin ai lam na chye lu ai.
Shana maga hkying 3:15pm aten hta gaw, Myen hpyen dap ni majan gasat nbung li 3 hte wa gap gasat lawm ai lam, shawnglam hpyen shisawk ni kawn chye lu ai.
Namhkam စခန္းသစ္ kaw nga ai Myen hpyen dap ni kaw na mung, lanak kaba ni hte Kawng Hke, Nam Hawm, Pan Tsan mare de, gap bun ai majaw, Nam Hawm mare na asak 80 ning re dinggai Arm ( snr ) Ya Lai hpe wa hkra nna, dai kaw jang si mat ai lam na chye lu ai.
Matut nna, May praw 3 ya hta mung, jahpawt hkying 6:20am aten kawn hkying 7:00am aten du hkra, TNLA Dap Dung ( 571 ) na hpyen hpung hte Myen hpyen dap Dapnu ( 33, 88 ) hpyen hpung ni, Kawng Wai mare makau hta numdaw mi gap hkat nna, TNLA Dap Dung ( 221 ) hpyen hpung ni hte mung, hkying 1:30pm aten kawn hkying 3:00pm aten daram du hkra, Man Swi mare makau kaw numdaw mi bai gap hkat ai lam na chye lu ai.
TNLA hpyen dap hte Myen hpyen dap ni gaw, April 29 ya shani kaw nna, kalang bai gasat majan byin wa ai re hpe chye lu ai.
