TNLA hte Myen hpyen dap Dapnu 99 kata na hpyen hpung ni gasat gala majan byin

Mungmyit Sinli Ga (Kachin Sub-state ) KIA Dap Ba 4 Dap Dung 8 ginra, Kaleng mare hte Banglaw mare makau kaw June shata 21 ya shani ka-ang hkying 12 hte hkying 1 lapran aten hta TNLA hte Myen hpyen dap Dapnu 99 kata na hpyen hpung ni gasat gala majan byin ai lam na chye lu ai.

June 20 ya shani hta mung, KIA Dap Dung 8 ginra rai nga ai, Chyawng Den mare hte Bang Lung mare makau kaw TNLA hpyen hpung hte Myen hpyen dap Hk.L.Y 45 dap, Kawnghka Pyi Tu Tsit pawng hpawm hpyen hpung ni gasat gala majan byin ai.

Ya aten hta KIA Dap Dung 8 ginra kaw Myen hpyen dap, Dapnu 99 kata na hpyen n gun 100 jan shamu shamawt du nga ai rai nna, KIA ni nga ai shara hte kade ntsan ai kaw du nga sai re majaw, Myen hpyen hpung ni matut nna shani sa wa jang gaw gasat poi byin wa mai ai lam, Galeng buga masha ni kawn chye lu ai.