TNLA hte Myen hpyen dap, Dapnu 99 ni gasat gala majan byin
Mungmyit Sinli Ga ( Kachin Sub-state ) KIA Dap Ba 6, Dap Dung 9 ginra, Maru Hpaka mare ntsa bum kaw TNLA hte Myen hpyen dap, Dapnu 99 kata na hpyen hpung ni July shata 12 ya jahpawt 6:00am aten kawn hkying 8:00am aten laman gasat gala majan byin ai lam chye lu ai.
Myen hpyen hpung ni gaw TNLA hpyen hpung ni nga ai Maru Hpaka mare ntsa bum de shamu shamawt htu lung wa ai majaw, gasat gala majan byin ai re lam, July 10 ya shani hta mung, Maru Hpaka ntsa bum kaw sha gap hkat ai re lam, shawnglam na salang langai shana wa ai.
July shata praw 9 ya hta Kutkai maga na lung wa ai Myen Hpyen Dapnu 99 ni gaw, Mawhan mare na lawk salang ni hpe shaga la nhtawm, Maru Hpaka Bum kaw nga ai TNLA hte Mawhik kaw nga ai KIA Mungshawa Hpyen Hpung ( MHH ) ni hpe ndai 2-3 ya laman shara sit ya, nsit ya jang shanhte shang gap sana ngu tsun ai lam, ginra shi sawk ni kawn chye lu ai.
Myen hpyen dap kaw nna lai wa sai June shata 30 ya shani hta Jinghpaw Mung hte Sam Mung ginra, 5 hta gap hkat jahkring ai lam hpe August shata 31 ya du hkra, shata 2 bai jat dat ai lam ndau laika shapraw da ai re.
Ndau laika shapraw da ai raitim, Myen hpyen dap gaw hpyen shamu shamawt lam ding yang ngu na galaw nga ai re majaw gasat gala majan shani shagu ngu na byin nga ai lam chye lu ai.
