TNLA hte Myen Hpyen Dap ni gasat gala majan byin

Mungmyit Sinli Ga (Kachin Sub-state) KIA Dap Ba 6, Dap Dung 9 ginra, Nam Gut hte Nawng Swi lapran kaw November shata 12 ya shani ka-ang hkying 12:20pm aten hta Myen Hpyen Dap, Dapnu (Tatma) 99 kata na hpyen hpung ni hte TNLA hpyen hpung ni gasat gala majan byin ai lam na chye lu ai.

“Myen hpyen ni gaw, Muse maga kawn hpyen modo 3 hte lai yu wa ai kaw TNLA hpyen hpung ni Nam Gut mare hte Nawng Swi lapran kaw hkap shingla gasat dat ai re” nga nna shawng lam na Salang langai shana wa ai.

Ya aten hta KIA Dap Dung 9 ginra hta Myen Hpyen Dap, Dapnu (Tatma) 99 kata na hpyen n-gun 400 daram shamu shamawt nga ai lam Salang wa matut chye lu ai.

November shata 11 ya shani hta mung, Chyukme Gaiwang Marau Bum makau kaw TNLA hpyen hpung ni hte Myen Hpyen Dap Dapnu (Tatma) 88 kata na hpyen hpung ni gasat gala byin ai lam chye lu ai.