TNLA hte Myen hpyen hpung ni gasat gala majan byin
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 9 ) ginra, Ja Bum Ginwang Daw, Dima Ninghtawn Nam Um mare makau Kawng Hka Balawng mare shinggan kaw TNLA hpyen hpung hte Myen Hpyen Dapnu ( 11 ) kata na hpyen hpung ni, September 29 ya jahpawt hkying 6:30am aten hta gasat gala majan byin ai lam na chye lu ai.
TNLA hpyen hpung ni, Nam Um mare kaw dung nna, mawdaw kaji kaba hpe ahkun hkanse hta ai shiga lu ai majaw, Mungbaw Hka mahkrai kaw sin ai Myen Hpyen Dapnu ( 11 ) kata na hpyen hpung ni shamu shamawt yu wa ai kaw gasat gala majan byin ai re. Hkying 4:00pm aten du hkra sinat kaba nsen ni naw ngoi nga ai lam, shawnglam shisawk ni kawn chye lu ai.
Gasat gala majan byin ai majaw, Muse, Kuthkai, Lashio yu ai mungshawa mawdaw ni gan hkring mat ai raitim, ya gaw lai wa lai sa bai galaw nga ai lam chye lu ai.
KIA Dap Ba ( 8 ) ginra de mung, Myen hpyen hpung ni n-gun law law hte shamu shamawt wa nga ai lam, ginra shisawk ni shana wa ai.
