TNLA hte Myen hpyen hpung ni gasat gala majan matut byin
Mungmyit Sinli Ga ( Kachin Sub-State ) KIA Dap Dung ( 34 ) ginra, Man Tsan mare hte Loi Hkun, Loi Hpyet, Nam Chyu shara ni hta TNLA Dap Dung ( 577 ) hpyen hpung hte Myen
hpyen Dapnu ( 88 ) na hpyen hpung ni, May praw 9 ya jahpawt hkying 8:00am aten kawn shana maga hkying 2:00pm aten daram du hkra, laja lana gasat majan byin ai lam na chye lu ai.
Gasat poi byin ai hta Myen hpyen dap maga, si hkala law wa ai majaw, hkying 2:15pm aten daram kawn Myen hpyen ni Helicopter nbungli ( 2 ) hte numdaw lahkawng lang wa htim gap ai lam, shawnglam hpyen shisawk ni kawn chye lu ai.
TNLA hte Myen hpyen dap ni gasat gala majan byin ai hta mungshawa ni galaw lu galaw sha, hkawmwa hkawmsa lam hkan, bawm hkam da ai majaw, May praw 8 ya shani hta Pang San mare na hpawmi Ndau Bawk Lu Asak 60 ning hte hpawmi Dashi Kai Htang Asak 32 ning yan bawm kabye kapaw la ai lam na chye lu ai.
Hpawmi Dashi Kai Htang gaw Pai galaw daw mat nna, hpawmi Ndau Bawk Lu gaw myi man hkan bawm hkyep hkra hkala mat ai lam, ya aten hkala hkrum ai yan hpe Namdu tsi rung kaw tsi tsi hkam la nga ai lam buga masha ni kawn chye lu ai.
