TNLA ni adup zingri rim woi mat ai salang yan hpe gumhpraw hte bai shaw la shangun

Balawng (TNLA) ni rim woi mat ai Mungmyit Sinli Ga (Kachin Sub-state) Namhpakka mare kaw na Salang Lashi Je Naw hpe gumhpraw sen 27, Salang Lahpai Zau Lum hpe gumhpraw sen 5 hte sa shaw la shangun ai lam na chye lu ai.

TNLA ni gaw gumhpraw sen 30 ndu wa yang Salang yan hpe ga htu lup kau na ngu tsun jahkrit shama ai majaw, dum nta masha ni hte mare kaw na kam ging ai kanu kawa ni gaw manu dara nhtawm, July shata 24 ya shana maga hkying 4:00pm aten daram hta Salang Lashi Je Naw hpe, July shata 25 ya shani gaw Salang Lahpai Zau Lum hpe Namhpakka mare shinggan kaw sa lu shaw la ai lam chye lu ai.

Namhpakka ginra kata hta Ka-ni dut lu dut sha masha hpan hkum hkra nga ai raitim, Balawng hpyen ni gaw nanghpam gasat shamyit ai hpe ga baw shatut nna ျပန္ေပးဆဲြ sha ai hpe magam bungli langai hku galaw nga ai hte ya na zawn Jinghpaw amyusha ni hpe sha adup zingri gumhpraw shawa sha ai lam galaw ai hpe seng ang ai shanglawt asuya kaw nna mung lit la hparan ya na hpe ra sharawng nga ai lam buga masha ni tsun ai kaw na chye lu ai.

Lashi Je Naw (asak 36) ning hte Salang Lahpai Zau Lum (asak 30) ning gaw sun galaw let hpun kawa ni htaw sha nna dinghku hpe lit la taw nga ai re lam, Salang yan hpe July shata 21 ya shana maga Balawng TNLA hpyen la marai 6 kaw nna mara kata adup zingri rim woi mat ai re lam, Namhpakka Buga masha langai tsun dan ai.

Balawng hpyen la ni gaw lai wa sai February shata 22 ya shani hta Namhpaka mare kaw na shadang Hkangda Brang Awng hpe gayat adup zingri sat kau ya ai rai nna, February shata 25 ya shani hta mung asak 71 ning re ai Salang Hpauwung Naw Seng hpe rim woi mat nna gumhpraw sen 100 hpyi ai kaw na sen 35 hte sa shaw la shangun ai lam chye lu ai.

July shata 26 ya shana hta mung Mungmyit Sinli Ga, Kutkai Ga Leng mare na salang Lashi Labya La San a dum nta kaw Balawng hpyen la marai lahkawng Pat Jasan galaw ai nga nna nta kata de a kajawng shang sawk tam ai lam galaw nna Salang Labya La San hte madu jan hpe adup gayet kau da ai lam na chye lu ai.

Lak nak lang wuhpung wuhpawng ni gaw tinang uphkang ai ginra kata kaw nga taw ai amyu sha ni, makam masham n ging hka ai mungchying mung shawa yawng hpe makawp maga galaw ra ai ngu mu mada ai lam, ndai mabyin hte seng nna KNC party kaw nna statement shapraw sa wa na re lam, KNC Ningbaw M Kawn La tsun ai kaw na chye lu ai.

Photo Credit; Kachin Heart Shalom