TNLA ni hpe Myen Hpyen Dap ni laja lana gasat gala majan byin
Mungmyit Sinli Ga (Kachin Sub-state) KIA Dap Ba 4 hte Dap Ba 6 ginra ni hta October shata 26 ya shani Ta-ang (Balawng) TNLA ni hte Myen HPyen Dap Dapnu 88, 99 pawng hpawm hpyen hpung ni laja lana gap hkat ai lam chye lu ai.
“Dai hpawt daw gaw Nam Hwi pa ntsa bum kaw gap hkat ai, dai hpang Mawhan makau Maru Hpaka bum kaw mung gap hkat ma ai, dai gap hkat ai shara hta Myen hpyen ni kawn Helicopter nbungli 2 hte wa htim gap ma ai” nga nna shawng lam na Salang langai shana wa ai.
October 25 ya jahpawt hkying 9:15am aten hta mung, Man Nawng hte Nampa Chi mare lapran kaw Dapnu 88, 99 na pawnghpawm hpyen hpung ni hte Ta-ang (Balawng) TNLA ni gasat gala majan byin ai.
Shana hkying 10:30pm aten daram hta mung Tamungne kaw Dap jung nga ai Hk.L.Y 290 Hpyen Dap kaw sinat kaji kaba ngoi ai lam, Tamungne mare na buga masha ni kawn chye lu ai.
