Tsan kagat shingjawng (Marathon) ginsup lamang galaw
KIO, KIA Ningbaw Kaba kaw na woi awn galaw ai, tsan kagat shingjawng (Marathon) ginsup lamang hpe December shata praw 6 ya jahpawt hkying 4:00am aten kaw na galaw ai lam chye lu ai.
Ginsup lamang hpe Mung Seng Yang Golf pa kaw galaw ai rai nna, asak 14 ning npu num la, asak 15 ning hte 40 ning lapran num la, asak 40 ning lahta num la rai, asak apang garan na gin sup ai lam woi galaw ai re.
Ginsup lamang hta KIO, KIA Ningbaw Kaba Nban La kaw na ginsup shang lawm ai ni hpe shatsam mungga shaga ai hta “Christmas ten kagat shingjawng ai lamang hpe mungdan ngang grin ai ni galaw ai hpe mu lu ai, mungdan nlu ai ni gaw n galaw ma ai, dai ni anhte Wunpawng amyu ni galaw ai gaw mungdan lu ai, shadip jahpang lu ai amyu ni re majaw ndai zawn galaw ai lam re” nga nna tsun ai.
Tsan kagat ai hta asak 15 ning hte 40 ning lapran na ni gaw, Laiza manau wang kaw na Sut Mu Awng mare, Mung Seng Yang Golf pa kaw pandung rai nna, asak 14 ning npu hte 40 ning lahta ni gaw, Laiza manau wang kaw na myu shani rung du, Mung Seng Yang Golf pa kaw sha, pandung tawn rai kagat shingjawng ai lam hpe galaw ai.
Shingjawng kum hpa hku na asak 15 ning hte 40 ning lapran na ni hpe masat (1) Miwa gumhpraw 2000, masat (2) 1500, masat (3) 1200 rai nna, top (10) shang ai ni hpe 500 lu na hte masat da ai aten kaw pandung hta lu du ai ni hpe shang lawm kumhpa 100 hpra hkumhpa shagrau jaw na re lam chye lu ai.
Matut nna asak 14 ning npu hte 40 ning lahta na ni hpe masat (1) Miwa gumhpraw 1500, masat (2) 1300, masat (3) 1000 rai nna, top (10) shang ai ni 400 lu na rai nna, masat da ai aten kaw pandung lu du ai ni hpe shang lawm kumhpa 100 hpra kumhpa jaw na re lam matut chye lu ai.
Dai hpawt na gin sup lamang hta masat da ai aten kaw pandung lu du ai, Top (10) shang ai hte masat lu ai masha yang 400 jan ram rai nna, ndai lamang hpe Mai Ja Yang kaw mung galaw ai rai nhtawm, ginsup lamang hta sa yu n-gun jaw ai shawa masha yang 1000 daram re lam chye lu ai.
