Tsang 10 jawngma langai hpe Kutkai Pyi Tu Tsit hpyen la ni adup zing ri da

Mungmyit Sinli Ga (Kachin Sub-state) Munggu mare lawk 2 kaw August shata 29 ya shana hkying 10:00pm aten daram hta tsang 10 jawngma Shadang Maran Sut Doi Ring Awng asak 18 ning hpe Kutkai Pyi Tu Tsit ni adup zing ri da ai lam na chye lu ai.

Mabyin lawng lam hte seng nna Munggu mare na amyu shayi ni tsun ai hta “Shadang Maran Sut Doi Ring Awng hte Shadang Li Gau Leng ( Miwa Amyusha ) ni gaw lusha seng kaw ga law hkat nna Li Gau Leng gaw Pyi Tu Tsit ni hpe phone set shaga dat ai hte sa wa nna mabyin hpe mung nsan ai sha, Sut Doi Ring Awng hpe adup abyen zing ri, palaya ni hte n gup hkan matep jahpye da ya ai. Pyi Tu Tsit ni hpe Phone set shana ai Li Gau Leng gaw Miwa Mung Shwili de hprawng yen mat sai” nga nna tsun dan ai.

Adup zing ri hkrum ai Shadang Maran Sut Doi Ring Awng gaw Munggu lahta tsang jawng kaw tsang 10 lung nga ai hte Kanu yan Kawa rai nga ai Salang Maran U Kyaw Oo ( Miwa amyusha ) hte Hpawmi Nhkum Tawm yan mung, Munggu mare kaw sha tsi seng dut nna nga ai re.

Pyi Tu Tsit ni gaw, Shadang Maran Sut Doi Ring Awng hpe Munggu mungshawa tsi rung kaw sa sa da nna ya aten hta tsi tsi hkam la nga ai lam chye lu ai.