Tsang (12) jawng yu poi lamang galaw
Kutkai Buga, Nawku Hpung Mahta Hpaji Jawng Ginra (KHG) a tsang (12) jawng yu poi lamang hpe March shata praw 4 ya jahpawt hkying 9:00am aten kawn, Rev. Lahpai Zau Yaw masat nawku htingnu kaw galaw la lu sai lam chye lu ai.
Jawng yu hpawng hta Kutkai Buga, Nawku Hpung Mahta Hpaji Jawng Ginra Hpa-awn, Rev. Maran Hka Li Awng kaw nna jawng yu sai jawngma ni hpe n-gun jaw shatsam mungga tsun ai hta
“Anhte a buga hpung hpaji jawng kaw na shawng ningnan tsang (12) awng pru ai jawng ma ni a kabu, arawng la, myit dik ai myi man nsam ni hte jawngma kanu kawa ni a kabu myit pyaw ai nsam ni hpe dai ni na jawng yu poi lamang hta mu lu ai majaw, KHG jawng a matu grai arawng la, myit pyaw ai, buga hpung kaw na mung, tinang a kashu kasha ni a prat shawnglam a matu hpaji hte npawt gaw dat ya lu ai majaw, grai kabu arawng la ai, matut nna hpaji hta n-gun bang, arang bang lu ai buga hpung kaba byin tai nga lu hkra, yawng matut jawm shakut ra nga ga ai” nga nna tsun ai.
Hpawng hta tsang (12) awng pru sai jawngma ni hte tsang (9) awng sai jawngma ni hpe awng pru masat laika pa shagrau sha-a ai lam galaw ai rai nna, tsang (12) awng pru sai jawngma yawng marai (18), tsang (9) awng ai jawngma yawng marai (36) re ai lam chye lu ai.
Kutkai Buga, Nawku Hpung Mahta Hpaji Jawng Ginra hpe laiwa sai 2013 ning hta hpaw hpang wa ai rai nna, (13) ning na ai hpang shawng ningnan lang na tsang (12) jawng yu poi lamang hpe galaw la lu sai re lam chye lu ai.
