Tsang shi awng ramma ningja jat sharin hpawng galaw
Laiza Jau Ginwang kaw nna, woi awn galaw ai hta Saradaw Ginwang Hpaji Makan Dap ni hte ta gindun let, 2021-2022 hpaji ladaw tsang shi awng ramma ningja jat sharin hpawng hpe June shata 24 kawn 26 ya shani du hkra Ja Htu Kawng RC Nawku jawng kaw galaw nga ai.
Mani na 24 ya shani hta mung sharin hpawng hpe sharin sai re dai hta 25 ya shani hta gaw, KIO, KIA Ningbaw Malai Dukaba Sumlut Gun Maw shatsam n gun jaw mungga tsun ai hta “Dai ni ramma ni a prat wa kabu hpa re ngu na sawn lu ai, hpa majaw ngu yang hpaji lam hpe e dai ni na kanu kawa ni ram ram myit rawt nna, ladat jaw jaw hte lam madun lu ai aten re, ja gumhpraw mung moi na ram n yak ai kanu kawa ni shakut lu ai aten re, lam madun na masha nga ai ramma ni shakut la na lam sha nga ai.
Moi gaw laika hpaji ngu hpe n gun jaw ra ai baw ngu ai n hkawt ai kanu kawa ni law law nga ai lam madun ai n nga ai, tinang tinang tam a bram la ra ai, Asuya ni jawng kaja n hpaw ya ai moi gaw hpaji hku dip sha ai, dai majaw ndai laman gaw anhte jawngma ni lata la na jawng shi jan nga ai tinang gara de sa mayu ai ndai hpe anhte lata la nna sa wa ra ai, tinang chye ai hpe akyu jashawn hkra ya kaw na myit ra ai” nga nna tsun ai.
Yaw shada lam hpe Laiza Jau Ginwang, Ginwang Up Jau, Wajau Peter Lazum Tu Lum tsun ai hta “Ramma ni tsang shi awng nna, callega, Dakkasu de rai nsa wa shi ai lapran kaw shawng lam a matu shan hte hpe e grau nna chye ra ai hpaji hte seng ai ningja jaw ra ai lam hpe mu ai, hpa majaw nga yang katsing hprap hprap hpaji a shawng lam a matu shan hte mu yang she ndai hpe gwi gwi rip rip asan sha ning mu hpaw let n gun bai ban ya na matu re” nga nna tsun ai.
Sharin hpawng hta Nawku daw jau ai hte makam masham a lam, Hkristan a nga sat nga sa kyang lai len, Tinang hkum hpe tinang gara hku gaw gap sa wa na, Tinang a ningmu kaja hpe lata nna gara hku nga pra ra ai, Shinggan bawng ring ai lam hte tinang kata bawng ring ai lam hpe jahpra ai lam, Ningmu kaja hte gara hku kit hkai sa ra ai, Tinang lata la ai pandung hpe gara hku sa wa ra ai, Tinang a pandung hpa baw rai ai lam hte KIO hpaji masa ni lawm ai lam chye lu ai.
