Tsin Yam Lawt Pahtau

Tsin-yam Lawt Pahtau

-Bai du wa sai le,
Hkam sha nngut sai e.
-Lahkrip shara ga,
Hkrap nga sha nngut sa.
-Hpyen yen magum bu na matu,
Nang ngai yawng a lit rai sai lu.
-Hprawng let koi nga mung nmai,
Pahtau dum ai shaning rai sai.
-7 Ning ngu ladaw hpring,
Myu sha ni yawng n gun dating.
-Myiprwi panglai hpung yawt rap,
Shaning aten hkum hti kahtap.
– Jamjau lam hpe sumru yu,
Myen hte she hka saga ngu.
-Hpyen yen tsin-yam a majaw,
Nu, Wa dum nta sutgan ma sai law.
-Maroi nni masin nsi,
Ngai shingtai wa kaning ndi.
-Goi e shang e Kachin myu e,
Tsin-yam kata nang shoi nang sha wa le.
-Hkumdi mu law hkum rai mu law,
Amyu lakung hkrum rai ga yaw.
-Nung, Rawang, Jinghpaw, Lisu,
Zaiwa, Lachik, Longvo yawng hpe Kachin ngu.
-Hka wa bra wa yang nhkrak,
Mai gan hpyen wa Sumprat dawk ahkak.
-Hkum kam mu lu myu sha ni e,
Kachin ngu nna kahkyin ai re.
-Labau hpe gaw hkum shamat,
Teng man lam hpe jum manat.
-Rawt malan sai hka htawk kau ga,
Padang Pahtau she dum saga.
– Nang ngai anhte yawng rawt ga,
Jiwa ni a kahpa galai la ga.
-Yawn madai ai hpe arang shatai,
Myithkrum lam gaw amyat nan rai.
-Hkrum ga, Ra ga, ya jang nawt ga,
Mungdan hpe mung gap di la ga.
-Yawng hpe ga saw hpungdim dat,
Tsin-yam kaw na lawt hkra gumtsat.
-Shagawp ga hpe hpung dim sai,
Salum hpajet jaw dat nngai.

Ningka wa: : Nampan Kasha
Ahba Tade
Bum Hpalap
9. June. 2018 a matu