Uru hka kaba wa nna mare masha nkau mi gan koi yen

Hpakant ginra hta August shata 17 ya jahpawt daw kawn, marang kaba matut manoi htu nga ai majaw, Mazup Yang, Seng Ra, Lung Hkang, Mawsi Zar, Nam Hpyit, Ngapyaw Taw, Myu Ma, Aye Mya Taya hte Mashi Kahtawng ni hta Uru hka kaba wa nna mungshawa nkau mi koi yen nga ai lam na chye lu ai.

Nta nkau mi gaw npu htap lim mat ai majaw nta ntsa htap de sit nga ai. Arung arai Ma kaji ni hte asak kaba sai ni hpe gaw hka ndep ai shara de tawn da ai, nkau mungshawa ni hpe gaw Hpungkyi jawng ni hkan shara jahkrat tawn da ai lam buga masha ni tsun ai.

Nta htinggaw hte masha kade re ai lam hpe atsawm nlu shagawn shi ai nga nna tsun ai. Hka koi yen nga ai mare masha ni hpe shinggyim nauna garum ningtum hpung ni hku nna, hka li hte htaw wa htaw sa galaw nga ai lam chye lu ai. matut nna koi yen nga ai mungshawa ni hpe shat malu masha ni hpe mungshawa nkau mi hku nna, shadu jaw nga ai nga nna tsun ai.

Ya na zawn hka kaba wa ai lam hte seng nna, Hpakant buga a hpung up Rev. Bau Tu Ja tsun ai hta, “Uru hka de ga shingbut (Me Za) hpe kabai bang ai majaw hka lam kaji nna mare de, hka lim wa ai lam byin ai. Anhte Hpakant ga gaw galaw sha mat wa ai sha law ai, galaw da ya ai lam nnga ai daram re. Dai majaw anhte Hpakant ga gaw manu mana lung seng pru ai shara raitim, nam kahtawng zawn rai chyu sha nga ra ai, seng ang ai asuya ni mung gumhpraw lu nna, galaw sha ai ni hpang maga sha tsap ai masha law ai. Mungchying mungshawa ni hpang maga yu ai nau nnga ai majaw ya na zawn, manghkang ni byin wa ai lam re” nga nna matut tsun ai.

Mungchying mungshawa ni hku nna mung, shanhte a yak hkak ai lam hta seng ang ai asuya ni kaw nna lit la galaw ya na matu, ahkyak nga ai nga nna buga masha ni tsun ai re.

Dai ning na Uru Hka kaba ai gaw, lai wa sai shaning ni hkan kaba ai hta grau jan kaba ai rai nna, Hpakant ginra hta ya na zawn hka hpyen hkrum ai gaw, shaning 10 ning jan 20 ning maga de du wa sai lam chye lu ai.

Photo Credit; KBC Kachin