Uru Hka kaw yawng lawm mat ai Salang Lashi Awng Nan a moimang hpe naw matut tam nga

Uru Ginwang Ginjaw, Hpakant Ginwang, Lama Bum Ginwang Daw, Lawnghkang Ninghtawn, Sang Hka mare kaw na Salang Lashi Awng Nan gaw October shata praw 2 ya jahpawt hkying 9:30am aten hta Uru Hka kaw Hkali dagup nna yawng lawm mat ai hta ya aten shi a moimang hpe matut manoi naw tam nga ai lam na chye lu ai.

Salang Lashi Awng Nan asak (32) ning gaw, Zupra Buga Hpung a ja gumhpraw kunhting magam gun lit hpe gunhpai nga ai rai nna, October shata praw 2 ya jahpawt hta shi a htingbu manang (2) hte myit hkrum mare asuya lawu tsang jawng shingdu Uru Hka awra hkan de nga dawn na matu Hkali kasha hte rap wa ai ten Hkali dagup mat ai majaw, manang 2 lawt pru wa ai raitim, Salang Lashi Awng Nan gaw yawng lawm mat ai re lam, buga na lit nga ai Salang langai tsun dan ai.

“Nga dawn sa ai gaw marai (5) marai 2 gaw ndai hkran kaw hkawm taw ai, marai 3 gaw awra hkran de Hkali hte sa ai Hkali kaji kaw marai 3 jawn ai majaw, Hkali gabawng kabang byin mat nna, yawng hka de gumhtawn bang ai kaw Hkali mung dagup mat marai 2 gaw kawng de lu rap wa ai shi gaw nhpye nhtu n-ga ni Jin labu palawng ni hpun da ai majaw kawng du mahka kaw lim mat ai” nga nna tsun dan ai.

Salang Lashi Awng Nan a ningrum ningtau jan hte Ma ni gaw Myitkyina kaw na Lawnghkang de lung wa ai raitim, Kamaing Lawa gate kaw nlu lai ai majaw Myitkyina de bai nhtang wa ai lam na chye lu ai.

Yawng lawm mat ai Salang wa a moimang hpe Sanghka, Maden Yang, Mawbawng, Maw Shan mare salang ni, Shinggyim Nauna Wuhpung Wuhpawng ni hte Wan sat dap ni kaw nna matut manoi naw tam nga ding yang re hpe na chye lu ai.

Photo Credit, Fb