Uru hka tung kaba wa ai majaw mungshawa ni a dum nta law law hten za hkrum

Hpakant ginra Uru hka, hka hku de marang matut manoi htu sawng nna hka tung kaba wa ai majaw, mungshawa ni a dum nta law law hten za hkrum nga ai lam chye lu ai.

July shata praw 1 ya shani kaw nna, Uru hka tung kaba wa ai hta mungshawa ni a dum nta law law hten za hkrum nga ai sha n-ga, Gin Si, Maden Yang, Seng Hka, Seng Ra, Awng Ra, Lawnghkang, Nam Mahpyit, Hpakant hte Seng Tawng mare ni hkan lwi nga ai, hka ni mung tung kaba wa ai majaw, mungshawa dum nta law law hten za hkrum nga ai lam, ginra masha ni kaw na chye lu ai.

Ndai zawn hka tung kaba nga ai hta July shata praw 1 ya shani, jak li hte garum gahtau sa ai, jak li langai dagup mat ai majaw, dai kaw jawn lawm ai mungshawa marai 7 kaw nna, Jan. Moe Aye ngu ai hpawmi langai hka leng kaw yawng lawm mat ai hta ya aten du hkra mu tam la ai lam nnga shi ai hpe chye lu ai.

Ya aten Hpakant ginra hta hka hpyen hkrum sha nga ai mungshawa ni nga shara, malu masha, lu hka hte lang rung lang rai ni yakhkak nga ai rai nna, marang mung matut manoi naw htu nga ai majaw, shimlum ai shara ni hkan hprawng koi yen hkawm nga ra ai hpe chye lu ai.

Matut nna Myitkyina ginra ni hta July shata praw 1 ya shani, Mali hka tung kaba wa ai majaw, mare kata hka lim ai lam ni byin nga ai hta ya aten hka yawm wa sai rai nna, Pang Wa ginra ni hta mung, marang htu sawng nna ga sharut gyi ai lam ni byin nga ai hta mungshawa nkau asak si sum ai lam ni byin ai hpe chye lu ai.