Uru Sengmaw Ginwang buga ramma hpa-awn ni a hkrumzup sharin bawngban hpawng galaw

Uru Sengmaw Ginwang Ramma Komiti ni woi awn nna, buga ramma hpa-awn ni a hkrumzup sharin bawngban hpawng hpe March shata praw 3 ya shani kaw nna praw 6 ya shani du hkra, Seng Hpra Buga kaw galaw ai lam chye lu ai.

“Yaw shada ai lam gaw buga ramma hpa-awn ni hkrumzup let sharin la ai lam re hte 2020 ning hta galaw sa wa na magam bungli ni hpe bawngban ai lam galaw ai re” nga nna Uru Seng Maw Ginwang Ramma Komiti Hpa-awn Sara Galau Ying Bawm tsun ai.

Sharin ga baw gaw “Lam shagu hta kaja reng ai magam bungli a ningli nang hkum nan madun dan u”. (Titu 2:7) ngu ai chyum laika ga baw hpe mahta nna, KBC Ningbaw Rev. Dr. Hkalam Samson kaw nna sharin ya ai lam chye lu ai.

Shana na aten hta ga tsun, ga htau num/la group hte group shingjawng ai lamang ni galaw ai rai nna, sharin hpawng hpe shaning shagu galaw ai hta dai ning na sharin bawngban hpawng hta gaw atsawm sha n-gun mi alu galaw la lu ai lam chye lu ai.

Sharin bawngban hpawng hta Uru Sengmaw Ginwang kata buga hpung 21 kaw na ramma hpa-awn ni yawng marai 54 tup sa du shang lawm ai lam chye lu ai.