Vocational Training Center kaw lung na jawngma ni hpe hkapla nga
Mai Ja Yang Muklum, Mai Ja Yang hkawlik wang dingsa kaw hpaw sharin nga ai, Vocational Training Center pang (2) hta hpaji sharin mayu ai jawngma ni hpe mying jahpan hkapla nga sai lam chye lu ai.
November shata praw 5 ya shani kawn shawk shawn form hpe jawng rung kaw sa la mai sai rai nna, ningpawt ninghpang laika hpaji ngut kre hkra nlu sharin la lu ai jawngma ni hte kanbau hpaji hta myit lawm ai ni hpe bai sharin na sara/num shalat la lu na matu, madang tsaw ai kanbau hpaji hpe matut hkaja la lu na matu hte tinang a kun dinghku mare buga hte amyu mungdan a matu kanbau hpaji hte madi shadaw garum lu na matu yaw shada let, hpaw sharin nga ai re lam chye lu ai.
Vocational Training Center kaw madung major hku nna, Civil Technology, Electric and Electronics Technology, Automotive and Machining Technology hpe sharin ya nhtawm, minor hku nna English, Mathematics, Physics, Chemistry, Computer hte Engineering Drawing ginhpan ni hpe sharin ya nga ai lam chye lu ai.
Shawk shawn na jawngma ni hta yawm dik laika tsang (10) awng da ai wa rai ra na hte asak (18-30) lapran na ni hpe ningshawng jaw hkapla mat wa na rai nhtawm, ndai jawng hpe laiwa sai 2023 ning kaw nna hpaw sharin wa ai hta ya aten jawngma yawng marai 22 sharin hkamla nga ai lam chye lu ai.
