Wa Jau Jhon Galang La Raw Director galaw nna gayat ai “တန္ဖိုး” Manu ngu ai sumla hkrung hpe Myen mung ting madun hpang
Wa Jau Jhon Galang La Raw Director galaw nna gayat ai “တန္ဖိုး” Manu ngu ai sumla hkrung hpe September shata 12 ya shani kaw nna Myen mung ting kaw nga ai ရုပ္ရွင္ရံုု ni hta madun hpang sai lam chye lu ai.
Manu ngu ai sumla hkrung gayat ai yaw shada lam hpe “တန္ဖိုး” ရုပ္ရွင္ Directer Wa Jau Jhon Galang La Raw ya na zawn tsun ai. “Jinghpaw mung daw hta grau nna ka-ni nanghpam lu sha nga ai ramma ni, anhte prat hpe manu shadan nna nchye nga ai, lam dam nga ai ni hpe shading sharai ya mayu ai majaw, anhte a shinggyim masha prat hpe manu dan ai hku nna nga sa ra ai ngu nna yaw shada let sumrai ka nna ramma ni na matu gayat da ai re” nga nna tsun ai.
“တန္ဖိုး”ngu ai sumla hkrung hpe Korea mungdan na shingni ninghkring hte lai wa sai 2017 ning December shata kaw nna dem hpang nna, 2018 ning January shata du hkra gayat ai re, ya shawa hpe lu madun lu hkra rai yang gaw laning mi hte shata 9 ram na ai re nga nna Wa Jau matut tsun ai.
Wa Jau Jhon Galang La Raw gaw shingni hpaji hpe Korea mungdan kaw sharin hkaja la ai rai nna, mungkan sumla hkrung hpung kaw nna shagrau jaw ai kumhpa ni hpe mung hkam la lu sai lam chye lu ai.
“တန္ဖိုး” sumla hkrung hpe jinghpaw mung a myo rai nga ai Myitkyina, Manmaw, Mogong the Hpakant ni hta mung madun hpang nga sai rai nna, Ndai sumla hkrung hpe sumla dum kaba ( ရုပ္ရွင္ရံု ) ni kaw madun ngut ai hpang, shara shagu na wunpawng myusha ni yu lu na matu matut galaw sa wa na re lam chye lu ai.
