“Wa” Mung Pang Sang Muklum kaw simsa lam 30 ning hpring masat poi lamang galaw

“Wa” Mung Pang Sang Muklum kaw dai ni April shata 17 ya shani hta simsa lam 30 ning hpring ai masat poi lamang galaw ai lam chye lu ai.

Dai masat poi lamang hta Htunghking ka manawt ai lam, hpyen n gun, laknak n gun ni hte hpyen hprim madun ai lam hpe April 15 ya shani kaw nna galaw nga sai re.

Hpawng lamang hta Asuya lit nga ai salang ni hte NCA ta masat htu sai rawt malan uhpung na lit nga ai salang ni hte NCA ta masat garai nhtu ai rawt malan uhpung na lit nga ai salang nkau, sa du shang lawm ai hpe chye lu ai.

“Wa” ginra hpe tinang up hkang Mungdaw masat ya na matu asuya hpe hpyi shawn nna, myit mada ai pan dung du hkra shakut sa wa na re lam, UWSP/UWSA a ning baw Salang Pau Yu Chan tsun ai.

Salang Pau Yu Chan woi awn ai “Wa” amyu sha laknak lang salang ni gaw Myen Mung Communist Party kaw nna garan pru nhtawm, 1989 ning April shata 17 ya shani hta “Wa” laknak lang uhpung UWSA hpyen dap hpe hpaw hpang dat ai re. Dai ninghtoi hpe mahta nna “Wa” Mung simsa lam 30 ning hpring ai masat poi lamang galaw ai hpe chye lu ai.

Ya aten hta “Wa” Mung gaw Myen Mung na laknak lang rawt malan uhpung ni hta hpyen n gun, laknak n gun, hpaga yung ga lam hta rawt jat nga ai ginra langai mung rai nga ai.