Wa Ra Zup P.T.Ts hpe KIA ni gap gasat
KIA Masat (2) Dap Ba, Masat (14) Dap Dung ginra hta Wa Ra Zup Pyi Tu Tsit (P.T.Ts) hpyen hpung ni hpe KIA ni gap gasat ai lam chye lu ai.
March shata 14 ya jahpawt hkying 7:00am aten daram hta gumshem Myen hpyen dap n-pu na, Wa Ra Zup P.T.Ts n-gun (50) daram, Wa Hka post maga de hpyen shamu shamawt lung wa ai kaw, KIA hpyen hpung ni bawm hte hkap gap gasat dat ai lam, lit nga ai salang ni kaw na chye lu ai.
Wa Ra Zup ginra hta P.T.Ts hte KIA ni hpyen masa shaja hkat nga ai rai nna, gumshem Myen hpyen dap ni mung, dai hpawt hkying 7:00am aten daram hta gasat gala majan nbyin ai Wa Ra Zup mare makau, Nam Sai mare kaw Jet Fighter lahkawng hte bawm wa jahkrat gap gasat ai lam chye lu ai.
Gumshem Myen hpyen dap ni gaw gasat gala majan nbyin ai shara ni hta nbungli drone ni hte hkrup mara bawm jahkrat gap gasat ai lam ni ding yang galaw nga ai re.
Ya aten Manmaw ginra hta mung, Ts.K.Hk (21) dap hpe KIA pawng hpawm hpyen hpung ni htim gasat nga ding yang rai nna, gumshem Myen hpyen dap kaw nna mung, shani shagu, nbungli drone ni hte gap gasat ai lam, malu masha laknak arung arai htaw jahkrat ya ai lam ni ding yang galaw nga ai hpe chye lu ai.
