Wa sara byin Francis a shawng nnan ngu na Myanmar Mungdan de sa du
Myanmar Mungdan hte Bangladesh Mungdan de ( 1 ) lang ngu na, Wa sara byin Francis gaw, Italy Mungdan Vatican kaw nna, November 26 ya shana daw pru hkawm wa sai rai nna, November 27 ya shana daw hkying 1:30pm aten hta Yangon nbungli daru hta du shang wa sai re lam chye lu ai.
Wa sara Byin Francis du wa ai shaloi nbungli daru kaw na hkring sa na shara St, Mary Cathedral nawku jawng du hkra, hkrun lam lapran wuwu didi hkaptau hkalum la nga ai lam chye lu ai. Ya aten Mungdan kata nga ai Hpung masha ni Yangon mare kaba kaw du zup nga ai.
November 28 ya shani gaw Naypitaw de Myanmar Mungdan Gumsan Magam U Thin Kyaw, Mungdan hpaji jaw salang Daw Aung San Suu Kyi, Myen hpyen dap a Dap awn Daju, Min Aung Hlai, hte lit nga ai asuya salang ni hte hkrum shaga na re.
November 29 ya shani gaw သုဝဏၰ ginsup pa kaw shawa yawng shanglawm ai Missa hkungga nawng ai lam galaw na, dai missa hkungga nawng ai shaloi Kachin IDPs Camp kaw na galaw jaw ai Udang Dawhkrawng hpe jum nna akyu hpyi shaman na lam, ndai lamang hpe MRTV, Skynet, Uptodate Channels ni hta Live madun mat wa na re lam chye lu ai.
Dai nawku lamang ngut ai hpang Budha hpunggyi chyawm tari ni hte Kaba Aye kaw hkrum zup na, dai hpawng Catholic saradaw kaba ni hte St. Mary nawku jawng kaw hkrumzup na re.
Noveber 30 ya shani hta gaw, St, Mary Cathedral nawku jawng kaw ramma ni hte Missa nawng na, mungga htawn na, shana maga hkying 1:05pm aten hta gaw Bangladesh Mungdan Dhaka de Nbungli hte bai rawt mat na re lam chye lu ai.
Wa sara byin Francis, Myanmar Mungdan de, du sa ai a yaw shada lam gaw, Mungdan ngwipyaw simsa wa lu na hte matsan jamjau hkrum nga ai hpung masha ni, amyu sha ni hpe gawan katsan n-gun sa jaw ai re lam chye lu ai.
