Waimaw ginra de gumshem Myen hpyen dap ni laknak kaba gap bun
Waimaw ginra de gumshem Myen hpyen dap ni laknak kaba gap bun ai lam chye lu ai.
July shata 10 ya shana hkying 9:00pm aten daram kaw nna, Myitkyina Amyawk dap hte Waimaw Hk.L.Y (58) gumshem Myen hpyen dap ni laknak kaba si (30) jan lang daram, hkrup mara gap shadam bun ai lam, ginra masha ni kaw na chye lu ai.
Myitkyina Myawk dap kawn Lamyang, Namwa maga de gap bun ai rai nna, Waimaw (58) dap ni gaw Hka Shi, Awng Mye (1, 2) hte Shwe Nyawng Pin maga de gap bun ai re lam chye lu ai.
Gasat gala majan mung nbyin ai sha gumshem Myen hpyen hpyen dap ni, ya na zawn laknak kaba hkrup mara gap bun ai lam gaw, mungshawa ni hpe da sang gap bun ai re lam, ginra masha ni matut tsun ai kaw na chye lu ai.
Ya aten Myitkyina hte Waimaw ginra ni hta hka hpyen tsin yam a majaw, dum nta ni hten za hkrum nga ai sha n-ga, mungshawa ni lam amyu myu yakhkak hkrum nga ai aten hta gumshem Myen hpyen dap ni laknak kaba hkrup mara bai gap bun ai re hpe chye lu ai.
Lai wa sai May hte June shata hta mung, gumshem Myen hpyen dap ni gap dat ai laknak kaba si, Waimaw ginra kaw hkrat kapaw ai majaw, mungshawa marai 20 jan daram asak si sum nna, marai 30 daram hkala la ai lam ni byin lai wa sai re.
