Waimaw ginra de Myen hpyen dap ni hpyen n-gun jat bang nga

Waimaw ginra de gumshem Myen hpyen dap ni hpyen n-gun jat bang nga ai lam chye lu ai.

March shata 17 ya shani kaw nna, Waimaw ginra de gumshem Myen hpyen dap ni Myitkyina maga na hpyen modo 10 kaw hpyen n-gun hpring hpring hte htu shadut jat bang nga ai lam, ginra masha ni tsun ai.

Waimaw ginra na shara law malawng hpe KIA pawng hpawm hpyen hpung ni zing madu tawn da sai hta ya aten gasat gala majan byin ai lam nnga ai raitim, gumshem Myen hpye dap ni hpyen n-gun htu shadut jat bang nga ai majaw, gasat gala majan bai byin wa na hpe ginra mungshawa ni myit tsang nga ai re.

Ya aten Manmaw ginra hta mung gasat gala majan laja nga ai rai nna, gumshem Myen hpyen dap ni gaw nbungli hte hpyen n-gun, malu masha, hpyen lang arung arai ni jahkrat jaw nga ding yang re ai majaw, majan aten galu na nga ai lam chye lu ai.