Waimaw ginra gasat gala majan byin

Waimaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai lam chye lu ai.

February shata 12 ya jahpawt hkying 6:00am aten daram kaw nna, KIA pawng hpawm hpyen hpung ni shara la nga ai, Mai Na hte Washawng lapran de, gumshem Myen hpyen dap hte P.T.Ts pawng hpawm hpyen hpung ni n-gun kaba hte htu shadut wa ai kawn, gasat gala majan byin wa ai re lam, lit nga ai salang ni tsun ai.

Gasat gala majan byin nga ai hta Myitkyina M.P.Hk kaw nna mung, laknak kaba ni hte gap garum ya nga ai sha n-ga, lagaw lam hku nna mung hpyen shamu shamawt htu shadut wa ai majaw, gasat gala majan byin wa ai re lam chye lu ai.

Waimaw hpyen man ginra ni hta KIA pawng hpawm hpyen hpung ni hte gumshem Myen hpyen dap ni shani shagu ngu na gasat gala majan byin nga ai rai nna, ya aten lahkawng maga hpyen masa shaja hkat nga ding yang re ai lam chye lu ai.