Waimaw ginra grup yin na hpyen yen mungshawa ni garum jaw ai lam yawm wa ai majaw grau grau yakhkak wa
Oplus_131072
Waimaw ginra hta gasat gala majan laja lana matut byin nga ai majaw, makau grup yin mare hkan na hpyen yen mungshawa ni hpyen yen aten ladaw galu wa ai hte maren, n-gu hte kaga malu masha garum jaw ai lam ni yawm wa nga ai hta grau grau na yakhkak wa nga ai re lam chye lu ai.
Ndai zawn yakhkak wa ai hte seng nna hpyen yen dabang na lit nga ai Sara langai ya na zawn tsun ai.
“Dai ning na ladaw hta anhte hpyen yen yen nga ai ni grau na yakhkak mat ai lam gaw, malu masha garum nga ai mungkan garum ningtum hpung, World Food Program (WFP) kaw na lu sha garum gumhpraw hpe shayawm na garum mat ai, dai hta grau na gaw htinggaw hpe shayawm mat ai, Camp kaw mung WFP kaw na lu sha garum gumhpraw shau ai hku lu ai htinggaw gaw grai shau mat ai, garum ningtum tsep kawp nan nlu mat ai htinggaw ni mung lawm ai” nga nna tsun ai.
Garum jaw ai lam yawm wa ai majaw, hpyen yen mungshawa ni yakhkak wa ai hta nta masha law ai htinggaw ni gaw, malu masha nlaw sha wa ai hte shinggan de mari sha na mung, ja gumhpraw nlu ai majaw lani hte lani grau grau yakhkak wa nga ai re lam, Sara matut tsun ai.
Laiwa sai aten mungkan garum ningtum WFP hte KBC garum ningtum wuhpung ni kaw na lit la garum ya nga ai raitim, ya aten n-gu malu masha htaw shalai na hkrunlam ni hta gumshem Myen hpyen dap ni, laja lana sawk jep rim kau ya ai lam a majaw, garum matum yawm wa ai re hpe mung chye lu ai.
