Waimaw Hk.L.Y (58) dap kawn hpyen dap makau na mare masha ni hpe yen shangun
Waimaw Hk.L.Y (58) Gumshem Myen hpyen dap kawn August shata 14 ya shani ka-ang hkying 12:00pm aten daram hta, hpyen dap makau grup yin na mare (4) hpe August 31 ya shani du hkra gan yen ya na matu hpyen dap kata kawn nsen kaba hte marawn jahtau tsun ai re lam, ginra masha ni shana wa ai kaw na chye lu ai.
“Dai mare ni gaw Mading mare, Hka Hkum mare, Labang mare hte Tangbau mare ni rai nna, dai ginra hta dum nta htinggaw 1000 jan daram nga ai lam, ya na zawn marawn ai gaw seng ang ai rung hkan na lit nga salang ni pi nchye ai shanhte na shanhte marawn tsun taw ai. Mare masha ni yawng yen taw sai” nga nna dai ginra na salang langai tsun ai.
August shata 13 ya shana maga hkying 5:00pm aten kaw nna 6:30pm aten laman hta mung, Waimaw Hk.L.Y (58) dap kawn Njung Bum, Labang kahtawng hte Mading mare grup yin de sinat kaji kaba gap bun ai hta, Wu Yan mare na Shayi Lang Myaw gaw Wai Maw de gat rai mari sa wa ai ten, Labang kahtawng mare makau kaw wa gap hkra la nna asak si sum mat ai lam chye lu ai.
Asak si sum mat sai Shayi Lang Myaw a moimang hpe Gumshem Myen hpyen ni gaw Myitkyina de htaw mat wa ai hta, moimang hpe shi a kawa sa hpyi ai shaloi Myen hpyen ni kawn njaw dat ai re lam matut chye lu ai.
