Waimaw hpyen man maga de, gumshem Myen hpyen ni laknak kaba suicide drone ni hte gap gasat nga
Waimaw hpyen man Nawng Si Paw maga de, December shata 15 ya shani hkying 1:10pm aten daram kaw nna, Myitkyina (M.P.Hk) hpyen dap kawn laknak kaba 122mm hte 10 jan lang gap bun ai lam chye lu ai.
Waimaw Muklum kaw dap jung shara jahkrat nga ai, gumshem Myen hpyen Hk.L.Y (58) dap kaw nna mung, KIA pawng hpawm hpyen hpung ni nga ai maga de, laknak kaba 120mm hte 5 lang gap bun ai sha n-ga, si hkam suicide drone 2 hte wa gap gasat ai lam, shawng lam shiga lawk kaw na chye lu ai.
December shata 14 ya shani ka-ang hkying 12:40pm aten daram hta mung, Waimaw hpyen man de, Jet Fighter 1 hte bawm wa jahkrat gasat ai rai nna, KIA Masat (2) Dap Ba, Masat (14) Dap Dung ginra, Noi Je hpyen man maga shara de, Myitkyina kawn rawt lung wa ai Jet nbungli hte bawm 2 wa jahkrat gasat ai lam chye lu ai.
Manmaw hpyen man shara de mung, KIA pawng hpawm hpyen hpung ni hte gumshem Myen hpyen ni shani shagu ngu na gasat gala majan byin nga ai rai nna, gumshem Myen hpyen dap mung shani shana Y-8, Y-12 nbungli hte (Ts.K.Hk 21) hpyen dap kaw hpyen arung arai, malu masha ni ding yang wa jahkrat ya nga ai lam, shawng lam na lit nga ai salang ni kaw na chye lu ai.
Hpakant KIA Masat (9) Dap Ba ginra de mung, KIA pawng hpawm hpyen hpung ni hte gumshem Myen hpyen dap ni hpyen masa shaja hkat nga ding yang re lam, lit nga ai salang ni kaw na chye lu ai.
