Waimaw hte Manmaw ginra ni hta gasat gala majan matut manoi laja nga
Waimaw, Manmaw ginra ni hta KIA hte gumshem Myen hpyen dap ni gasat gala majan matut manoi laja nga ai lam chye lu ai.
September shata praw 2 ya shani du hkra, Waimaw Lamyang grup yin hte Manmaw ginra ni hta KIA pawng hpawm hpyen hpung ni hte gumshem Myen hpyen dap pawng hpawm hpyen hpung ni gasat gala majan laja lana matut byin nga ai lam, shawnglam lit nga ai salang ni kaw na chye lu ai.
Gasat gala majan byin nga ai shara de gumshem Myen hpyen dap ni gaw, nbungli hpe madung jai lang nna gap gasat nga ai rai nna drone, laknak kaba hpan hkum hte mung gap gasat nga ai sha n-ga, lagaw lam hku nna mung htu shadut htim gasat nga ai majaw, gasat gala majan matut laja nga ai lam chye lu ai.
August shata 20 jan kawn gumshem Myen hpyen dap ni gaw Waimaw, Manmaw hte Hpakant ginra ni de hpyen n-gun kaba hte ladat amyu myu hku nna kalang bai htu shadut htim gasat nga ai rai nna nbungli, drone, laknak kaba ni hte mung shani shagu gap gasat nga ai majaw, mungshawa si hkala hkrum nga ai hte dum nta law law hten za hkrum nga ai re.
Waimaw, Manmaw hte Hpakant ginra ni hta gasat gala majan matut manoi matut byin nga ai majaw, dai ginra na mungshawa ni hpyen koi yen hkawm nga ai aten galu wa sai hte maren, malu masha, tsi mawan, lu hka, lang rung lang rai, nga shara, lam amyu myu hta grau grau na yakhkak wa nga ai lam chye lu ai.
