Waimaw Muklum kaw shaning ningnan hkap tau ai ginsup poi lamang hte gat dut poi lamang galaw

Waimaw buga ni a shaning ningnan hkap tau ai ginsup poi lamang hte gat dut poi lamang hpe Waimaw Muklum kaw December shata 31 ya hte January praw 1 ya shani galaw na re lam chye lu ai.

Ginsup poi lamang hta ginsup hpan amyu myu hte Ma kaji kaw nna sak kung pang ni kaw du hkra shang lawm ginsup mai ai re hte gat dut ai lamang hta lawk hte lawk garan nhtawm, shingra lu sha hpan hku nna galaw shapraw ai lam galaw ai re.

“Lamang hpe galaw ai yaw shada lam gaw, Hpung masha ni yawng mahkra hte kabu gara ai hte December shata hta yawng shang lawm let, Karai Kasang a chyeju hpe hkamla nna ngwi pyaw hkam kaja ai hte gabu gara let hpung masha ni yawng shaning ningnan de, du shang wa lu na matu hte sumtsan de nga hkawm nga ai ni mung tinang a kanu buga hpung hta yawng jawm hpawng de let, Karai Kasang hte htinglu hting lai nna Karai Kasang jaw ya ai sak hkrung lam ningnan hta chyeju hkamla lu na matu re” nga nna Waimaw buga hpung magam gun Rev. Hpakawn Tu Nan tsun ai.

Lak san lamang hku nna shaning ningnan hkaptau ai yu ngwi pyin ra (Stage show) lamang, lawk hte lawk lu sha shadu shingjawng ai lamang, Ba pa htu shingjawng ai lamang, Htawngka ka num, la, ramma ni htawng ka ka shingjawng lamang ni lawm ai lam chye lu ai.

Ginsup poi lamang hta kum hpa lu ai ni hpe gaw, ginsup hpan hta hkan nna shagrau ai lam galaw na re hte ginsup poi gat dut poi lamang ni hpe shaning shagu galaw ai re lam chye lu ai.

Photo credit; LG Khoolhug