Wan hpyen hkrum ai Je Yang hpyen yen mungmasha ni nta nnan de htaw sit nga sai

Wan hpyen hkrum ai Je Yang hpyen yen dabang lawk 6-B na mungmasha ni June shata 21 ya shani hta nta nnan de htawt sit shang wa lu sai lam chye lu ai.

Dum nta nnan gaw gap da lu sai rai tim shat gawk nkau mi hte myi hprap wan nlu shi ai majaw, naw yak nga ai hpe Lawk 6-B a komiti ningbaw, Salang Naw Ring ya na zawn tsun ai.

“Nta gaw galaw ngut sai raitim shat gawk nkau mi n ngut shi ai majaw, shat shadu sha na lam hte myihprap wan mung nlu shi ai, asak kaba ai dinggai dingla ni hte ma ni shinggan pru hkawm sa ai lam hta yak nga ai re”

Gaw gap da lu sai dum nta hpe gaw, Metta hte KRDC wuhpung wuhpawng ni madung garum ya ai rai nhtawm, Ginjaw hpyen yen lakawn lanawn kaw nna lit la gaw gap ya ai re.

Ya gaw gap da ngut sai dum nta nnan de htawt wa ai htinggaw (36) gaw, lai wa sai March shata 19 ya shani nmyit mada ai sha wan hpyen tsin-yam hkrum mat ai majaw, gaw gap ya ai re lam chye lu ai.