WMR amyu shayi ningbaw ningla sharin bawngban hpawng galaw
Wunpawng Amyusha Mungbawng Rapdaw (WMR) Amyu Shayi Komiti hte Hope International wuhpung wuhpawng ni pawng nhtawm, WMR amyu shayi ningbaw ningla sharin bawngban hpawng hpe December shata 8-9 ya laman Myitkyina, WMR Rung kaw galaw la lu sai lam na chye lu ai.
Sharin bawngban hpawng hta Hope International kaw na Sara Htawle Brang Seng kaw nna Personal Leadership Transfromation hte seng ai hpe sharin ya ai re lam chye lu ai.
Ya aten Wunpawng amyusha ni hta myit hkrum gahkyin gumdin lam ra ahkyak nga ai re majaw, Muklum kaba de nga ai wuhpung wuhpawng ni, bawsang shagu hte makam masham hpung shagu kaw na amyu shayi ni shang lawm ai hte galaw sa yang she myit hkrum gahkyin gumdin lam de du wa lu na re ngu ai yaw shada lam hte lamang hpe galaw ai re lam, WMR amyu shayi hpu-awn Saranum Ah Sar Mee tsun ai.
“Wunpawng amyu sha ni bra taw ai hpe manang ni ra sharawng ai raitim, anhte gaw dai hku nmai ai, tinang hkum tinang shawng galai shai nna wuhpung wuhpawng hpe mung woi galai shai ga ngu myit mada lam hte Personal Transfromation workshop hpe galaw ai re” nga nna tsun ai.
Hpawng lamang hta makam masha hpung shagu hte bawsang shagu na amyu shayi ni marai 25 sa du shang lawm ai rai nna, matut nna mung Muklum mare kaba hta shanu nga ai bawsang shagu na amyu shayi ni hte makam masham hpung shagu na amyu shayi ni hpe jahkum nhtawm, ya na zawn sharin bawngban hpawng ni hpe shata shagu galaw sa wa na re lam, WMR amyu shayi komiti kaw na chye lu ai.
Photo Credit; WMR
