Woi Chyai IDPs camp Gawknu kaw International Youth Day lamang galaw
Health Poverty Action (HPA) hte Kachin Women’s Association (KWA) kaw nna woi awn nhtawm, International Youth Day lamang hpe August shata 12 ya jahpawt hkying 9:00am aten kaw nna shana daw hkying 3:00pm aten du hkra Woi Chyai IDPs camp Gawknu kaw galaw ai lam chye lu ai.
Ndai International Youth Day hpe UN kaw nna masat da ai rai nna, ramma ni nan wuhpung wuhpawng shagu, mung masa lam, shinggyim masa lam, sut masa lam hta shang lawm wa lu hkra ngu yaw shada let galaw ai re lam, Woi Chyai camp Ramma Ningtau Ningbaw Ga Myu Li Awng tsun ai.
“International Youth Day ngu ai gaw ramma ni wuhpung wuhpawng shagu, mung masa zawn re hkan, Social, hpaga yungga dai hkan ramma ni nan shanglawm hkra, ramma ni a ahkaw ahkang lu jaw na matu ramma ni jawm hpawng ai dai lam hpe yaw shada ai re” nga nna tsun ai.
Lamang hta Sara Isak kaw nna ramma hte sut masa lam hte seng nna hpaji jaw hkaw tsun dan ai lam galaw ai re, lai wa sai August shata praw 8 ya shani manu dan ai ramma ngu ai gabaw hte laika kaiji ka shingjawng ai hta, masat 1,2,3 lu ai ramma ni hpe mung masat masa kumhpa shagrau ai hte ramma ni hpe ga san hpan 15 hte san htai galaw ai lamang ni, U Mun, Ka din, hte kaga ginsup lamang ni lawm ai lam chye lu ai.
Youth Day lamang galaw ai a ntsa Woi Chyai camp na shayi Kamu Htu Ra shi a mu mada lam hpe tsun dan ai hta, “anhte ramma ni gaw tinang na wuhpung wuhpawng hta grau nna akyu rawng ai amu daw jau nga lu ai, amyu hte mungdan, Mungkan a matu tinang gaw akyu rawng apnawng dawjau wa lu ai ramma ni byin tai lu na matu hte ramma ni myit hkrum ai lam hpe lu la lu matu yaw shada let COVID-19 ana zinli byin taw ai laman kaw raitim, anhte dai zawn lu galaw ai re” nga nna tsun ai.
Ginjaw COVID-19 Ana Zinli Makawp Ninghkap Komiti kaw nna COVID-19 aten ladaw laman masha hpawng chyawm ai lam hpe marai 50 a lahta njan lu na ngu masat da ai lam nga ai raitim, ramma ni gaw dabang kata na hkrai re majaw tsang ra na madang nnga na re ngu nna dabang kata jahkrup nhtawm galaw ai re hte lamang hta hkamja lam hte htap htuk hkra lata shin shara ni lajang da ai lam, Mask ni garan jaw ai sha n-ga, langai hte langai shara jahkrat nna dung shangun ai lam galaw ai re hpe chye lu ai.
International Youth Day lamang hpe lai wa sai shaning ni hta buga ramma ginlung hpawng hku nna galaw ai raitim, dai ning gaw COVID-19 ana zinli a majaw tinang dabang kata kaw sha galaw ai re lam, lamang hta Woi Chyai camp kata na ramma ni marai (160) daram sa du shanglawm ai lam chye lu ai.
